Ym mis Mai 2025, cymerodd Coleg Sir Benfro gam pwysig wrth ddatblygu cyfleoedd rhyngwladol i ddysgwyr ag anghenion dysgu ychwanegol ac anableddau, diolch i gyllid gan Raglen Gyfnewidfa Ddysgu Ryngwladol Cymru, Taith.
Roedd cais llwyddiannus y Coleg i Taith, a gyflwynwyd yn 2024, yn cynnwys ymweliad paratoadol staff ac yna rhaglen symudedd dysgwyr dros 24 mis. Cynlluniwyd y prosiect i archwilio datblygiad sgiliau galwedigaethol cynhwysol yn y Ffindir, gyda ffocws penodol ar y dysgwyr hynny sy'n cymryd rhan mewn cystadlaethau sgiliau.
Fel rhan o gam cyntaf y prosiect, teithiodd dau aelod o staff o Academi Sgiliau Bywyd y Coleg - gan gynnwys Rheolwr Maes Cwricwlwm ac arweinydd y daith, Chris Davies - i Helsinki a Turku. Nod yr ymweliad oedd archwilio arfer gorau mewn addysg alwedigaethol gynhwysol a sefydlu partneriaethau rhyngwladol gyda golwg ar gydweithio yn y dyfodol.
Yn ystod yr ymweliad, ffurfiodd staff bartneriaeth addawol gyda Live Vocational College yn Helsinki, un o brif ddarparwyr addysg gynhwysol y Ffindir. Roedd y daith hefyd yn cynnwys mynediad VIP i Taitaja 2025 yn Turku - cystadleuaeth sgiliau galwedigaethol cenedlaethol y Ffindir - gan roi cipolwg amhrisiadwy ar sut mae sgiliau cynhwysol yn cael eu dathlu a'u hymgorffori ar lefel genedlaethol.
Wrth siarad am y profiad, dywedodd Chris,
“Cawsom ein hysbrydoli gan yr ethos cynhwysol yn Live College a chan raddfa a phroffesiynoldeb Taitaja. Mae'n amlwg bod llawer y gallwn ei ddysgu gan ein gilydd, ac rydym yn gyffrous i symud y bartneriaeth hon ymlaen.”
Ychwanegodd Rheolwr Prosiect Rhyngwladol ColegauCymru, Siân Holleran, 
“Mae rhaglenni symudedd rhyngwladol a ariennir a ddarperir trwy Taith yn chwarae rhan hanfodol wrth helpu dysgwyr a staff ledled Cymru i ddod yn ddinasyddion byd-eang. Mae'r profiadau hyn yn agor drysau, yn ehangu gorwelion, ac yn cyfrannu at ddatblygu gweithlu cryf - ac yn y pen draw, economi gref. Mae'n arbennig o galonogol gweld grwpiau heb gynrychiolaeth ddigonol, fel dysgwyr ag anghenion ychwanegol, yn cael eu cefnogi i gael mynediad at y cyfleoedd hyn sy'n newid bywydau.”
Mae'r ymweliad hefyd yn cyd-fynd â mewnwelediadau diweddar a rannwyd yn adroddiad ColegauCymru ar ddysgu o'r Ffindir, sy'n archwilio sut y gallai elfennau o fodel addysg a hyfforddiant galwedigaethol y Ffindir lywio a chryfhau dull Cymru ei hun.
Edrych tua’r dyfodol
Mae'r prosiect bellach yn symud i'w ail gam, gyda chynlluniau ar y gweill ar gyfer ymweliad cilyddol: bydd Coleg Sir Benfro yn croesawu staff o Goleg Live i Gymru yn ddiweddarach eleni. Gan edrych ymhellach ymlaen, mae'r Coleg yn paratoi i fynd â grŵp bach o ddysgwyr i'r Ffindir yn 2026 - ymweliad nodedig a allai weld tîm o Gymru yn cystadlu yn Taitaja am y tro cyntaf erioed.
Daw'r gweithgaredd rhyngwladol hwn hefyd ar adeg o ffocws cynyddol ar ragoriaeth sgiliau yma yng Nghymru. Ym mis Tachwedd 2025, bydd Cymru yn falch o gynnal Rowndiau Terfynol Cenedlaethol WorldSkills UK, gan arddangos y dalent galwedigaethol orau o bob cwr o'r DU. Mae cyfranogiad Coleg Sir Benfro mewn cystadlaethau sgiliau byd-eang yn tynnu sylw at y rôl bwysig y mae cydweithio rhyngwladol yn ei chwarae wrth baratoi dysgwyr - gan gynnwys y rhai ag anghenion dysgu ychwanegol - i ffynnu ar lwyfannau cenedlaethol a rhyngwladol.
Gwybodaeth Bellach
Adroddiad ColegauCymru
Strategaethau ar gyfer Symud yn Rhydd: Ymagwedd y Ffindir at Addysg a Hyfforddiant Galwedigaethol
Hydref 2024
Mae Ysbrydoli Rhagoriaeth Sgiliau yng Nghymru yn rhaglen a ariennir gan Lywodraeth Cymru sy'n cefnogi dysgwyr galwedigaethol i ddatblygu sgiliau o'r radd flaenaf trwy gystadlaethau, hyfforddiant a chyfleoedd rhyngwladol.
WorldSkills UK yw'r mudiad cenedlaethol ar gyfer hyfforddiant galwedigaethol sy'n seiliedig ar gystadlaethau yn y DU, gan rymuso pobl ifanc o bob cefndir trwy feincnodi rhyngwladol, datblygiad proffesiynol a chystadlaethau sgiliau i godi safonau technegol, hybu cyflogadwyedd a gyrru twf economaidd.
Taith yw Rhaglen Gyfnewid Dysgu Rhyngwladol Llywodraeth Cymru.
Colegau Cymru yn cefnogi ADY mewn Addysg Bellach
Siân Holleran, Rheolwr Prosiect Rhyngwladol ColegauCymru
Sian.Holleran@ColegauCymru.ac.uk
